கவ்வாலி நேரம் - மாலிக்குல் முல்க் - மர்ஹும் உஸ்தாத் நஸ்ரத் ஃபதேஹ் அலி கான் சாஹேப்

நான் இறைவனை பாடும் போது, நான் இறைவனின் பொருத்தத்தோடு , இறை இல்லமாம் கஃபதுல்லாஹ்விலே மக்கமா நகரிலே, இறைவனின் முன்னிலையிலேயே பாடுவதாக தான் உணர்கிறேன், ஹஜ்ரத் முஹம்மது (ஸல்) அவர்களை பற்றி பாடும் போது, மதினா நகரிலே அன்னாரின் மஜாரின் அருகிலேயே அமர்ந்து, பாடுவதாக உணர்வதோடு, அன்னாருக்கு மரியாதை செலுத்தி அவர்களின் செய்திகளை எல்லாம் ஏற்றுக் கொள்வதாகவும் உணர்கிறேன்.

- நஸ்ரத் ஃபதேஹ் அலி கான்

-------------------------------------

அல்லாஹ்(ஜல்)வை புகழ்ந்து பாடும் பாடலுக்கு ’ஹம்து’ என்று வழங்கப்படுகிறது.

ஹஜ்ரத் பெருமானார் (ஸல்) அவர்களை புகழ்ந்து பாடும் பாடலுக்கு புனையும் கவிதைக்கு ‘நாத்’ என்று பெயர்.

கீழே கேட்க இருப்பது ஹம்து வகையை சேர்ந்த அற்புதம்.

------------------------------

http://www.youtube.com/watch?v=Sr6CNejcFRQ&feature=player_embedded
------------------------------
மாலிக்குல் முல்க்
லா ஷரீக்க லஹு

வஹ்தஹு
லா இலாஹா இல்லா ஹு

ஷம்ஸ் தப்ரேஜ் கர் ஹுதா தலபி

குஷ்புகுவான் லா இலாஹா இல்லா ஹு

ஆட்சி செய்யும் பேரரசன் 
(ஆட்சி - குரான் ஷரீஃபில் 67 வது அத்தியாயம்)
அவன் இணை துணை இல்லாதவன்
அவன் தனித்தவன்
இறைவன் என்று யாருமில்லை அல்லாஹ்வை தவிர
இறைவனை தேடிய ஷம்ஸ் தப்ரேஸ் 
(ஷம்ஸ் தப்ரேஸ் (றஹ்) என்பவர்கள் மௌலானா ரூமி (றஹ்) அவர்களின் ஆசிரியர் ஆவார்கள் - மேலும் சூஃபியாக்களை பொறுத்தவரை புனிதராக போற்றப்படுபவரும் ஆவார்கள்)
பரப்பிய பூவின் நறுமணம்
வேறு யாருமல்ல அல்லாஹ்வை தவிர


தெரே ஹி நாம் ஸே ஹர் இப்திதாஹே

தெரே ஹி நாம் தக் ஹர் இந்திஹாஹே

தெரி ஹம் தோ ஸனா - அல்ஹம்துலில்லாஹ்

கெ து மெரே முஹம்மத் (ஸல்) கா ஹுதா ஹே

உனது பெயர் கொண்டே அனைத்தும் துவங்குகிறது
உனது பெயர் கொண்டே அனைத்தும் முடிவுபெறவும் செய்கிறது
உனது புகழ் போற்றப்படக் கூடியது - எல்லா புகழும் அல்லாஹ்வுக்கே
நீயே எனது உயிரினும் மேலான முஹம்மத் (ஸல்) அவர்களின் இறைவன் ஆவாய்..!

அல்லாஹீ அல்லாஹூ ... (திக்ர் - நினைவு கூர்வது)

யெ ஜமின் ஜப்னா தி
யெ ஜஹான் ஜப்னா தா
சாந்த் சூரஜ்னா தி
ஆஸ்மான் ஜப்னா தா

பூமி என்று ஒன்று இல்லாதிருந்த போது
உலகம் என்று ஒன்று படைக்கப்படாதிருந்த போது
இன்னும் சந்திரனும் சூரியனும் 
ஆகாயமும் இல்லாதிருந்த போது

ராஜே ஹக் பி கிஸி பர் அயான் ஜப்னா தா
தப்னா தா குச் யஹான்
தப்னா தா குச் யஹான்
தா மகர்
து ஹி து

ஹக் எனும் பேருண்மை ஒருவருக்கும் அறிவிக்கப் படாதிருந்த போது
ஒருவருக்கும் அறிவிக்கப் படாதிருந்த போது
ஒருவருக்கும் அறிவிக்கப் படாதிருந்த போது
ஒருவரும் இல்லை
உன்னை தவிர 

அல்லாஹு அல்லாஹு  ... (திக்ர் - நினைவு கூர்வது)

பஹுன்ச்சே மெஹ்ராஜ் மெய்ன் அர்ஷ் தக் முஸ்தஃபா

ஜப் நா மாபுத்-ஒ-பந்தே மெய்ன் பர்தா ரஹா

எப்பொழுது முஸ்தபா அவர்கள் (தூய்மையானவர்கள் என பொருள்படும் -பெருமானார் (ஸல்) அவர்களின் மற்றொரு பெயர்) இறைவனது அர்ஷ் இருக்கும் இடத்திற்கு மெஹ்ராஜ் அன்று சென்றார்களோ 

எப்பொழுது அரசனுக்கும் (அல்லாஹ்) அடிமைக்கும் (ஹஜ்ரத் முஹம்மத் (ஸல்)) இடையில் இருந்த திரை விலக்கப்பட்டதோ 

தப் மலாயிக் னெ ஹஜ்ரத் செ ஜுக் கர் கஹா

சாரி மக்லூக் மெய்ன் ஹக் நுமா து ஹி து

அப்பொழுது மலாயிகத்மார்கள் ஹஜ்ரத் முஹம்மத் (ஸல்) அவர்களிடம் மரியாதையோடு தலைகுனிந்து சொன்னார்கள்

அனைத்து படைப்புகளிடத்திலும், பேருண்மை என்பது இறைவன் மட்டுமே - அது நீயே!

கியுன் பியா இப்னு ஹைதர் னெ ஜாம்-எ-ஃபனா?

க்கால் கிச்வா யி தப்ரேஜ் னெ கியுன் பலா?

ஏன் ஹைதரின் மகனார் ஃபனா (இறை பாதையில் தன்னை அழித்துக் கொள்வது) குவளையை பருகினார்கள்?

ஏன் (ஷம்ஸ்) தப்ரேஜ் உயிரோடு தோல் உரித்து அழிந்து போக சம்மதித்தார்கள்

தார் பர் சர்ஹ் கர் மன்சூர் னெ கியா கஹா?

சப் ஃபனா கெ கிலோனெ ரஹா து ஹி து

(மன்சூர்) ஹல்லாஜ் அவர்கள் தூக்கு மேடையில் என்ன உரைத்தார்கள்?

இந்த அனைத்து உயர்ந்தவர்களும் ஃபனாவாகி (அழிந்து) போனார்கள், ஆனால் என்றென்றும் நிலைத்து நிற்பவன் நீயே 

(ஹைதரின் மகனார்: இப்னு ஹைதர் - ஹைதர் என்றால் சிங்கம் என்று பொருள்படும் - இது ஹஜ்ரத் அலி (றலி) அவர்களின் மற்றொரு பெயர் - ஹஜ்ரத் ஹஸன் (றலி) அவர்களை குறிக்கும்)

(தப்ரேஜ் - ஷம்ஸ் தப்ரேஜ் - மவ்லானா ரூமி (றஹ்) அவர்களின் மார்க்க குருவும் ஆவார்கள்)

(ஹல்லாஜ்  - மன்சூர் ஹல்லாஜ் - மாபெரும் சூபி ஞானி: )

பாடல் தொடர்கிறது.....

இணைப்புகள்:

http://www.urdustudies.com/pdf/21/15Hyder.pdf

http://qaul.blogspot.com/

http://nusrat.info/

கவ்வாலியின் மின்னும் நட்சத்திரம் - ஷாஹென்ஷா-ஏ-கவ்வாலி - The Brightest Star of Qawwaali

1948 அக்டோபர் 13ல் பாகிஸ்தான் நாட்டின் லைலாப்பூர் என்ற நகரில் இசையின் உருவம் இப்புவி மீது அழுது கொண்டே பிறக்கிறது.  (லைலாப்பூர் என்ற ஊர் இப்போது ஃபைஸலாபாத் என்ற பெயருடன் விளங்குகிறது).

 உஸ்தாத் பதேஹ் அலி கான் எனும் இசை மேதையின் குடும்பத்தில் ஐந்து பெண் மக்களுக்கு பிறகு ஆறாவதாக அந்த இசையின் பெரு உருவம் (பெரு உருவம் என்றால் பெருத்த உருவம் மட்டுமல்ல பெருமைக்குறிய உருவமும் கூட) முதன் முதலாக அழுகையின் ஊடாக இசைத்தது.

உஸ்தாத் பதேஹ் அலி கான் மற்றும் அவரது சகோதரர் உஸ்தாத் முபாரக்  அலி கான் மற்றும் சலாமத் அலி கான் ஆகியோர்களின் இசைக் குழுவில் சிறு வயதிலேயே இசை உருவம் தன்னை இணைத்து கொண்டு செயல் பட தொடங்கியது.

தபேலாவில் விரல்கள் படர ஆரம்பித்து பாகிஸ்தானின் பாரம்பரிய இசையான 'கயால்' எனும் இசையை சரி வர உள்வாங்கி கொண்டது.

1964ல் தந்தையாரின் மறைவும், 1971ல் தந்தையின் சகோதரரின் மறைவுக்கு பிறகும் அந்த இசை உருவம் தலையெடுக்க ஆரம்பித்தது.

'கவ்வாலி' என்றால் 'உரக்க சொல்வது' என்றே பொருளாம். யாரிடம் எதை சொல்வது? - உண்மையில் இறைவன் மீதும் அவனது தூதர் முஹம்மது நபிகள் ஸல்லல்லாஹு அலைஹிவஸல்லம் அவர்களின் மீதான் அன்பை உரக்க சொல்வது. அடுத்து யாரிடம் சொல்வது? அல்லாவிடத்திலா? ஊர் உலகத்துக்கா? - என்றால் அதுவும் இல்லை, தனக்கு தானே சொல்லி கொள்வது.அதை உரக்க சொல்வதற்கு பெயர் தான் கவ்வாலி.

கவ்வாலி என்பது சூஃபி இசையின் ஒரு வடிவம். சூஃபி என்றால் இறைவனை தவிர்த்த வேறு சிந்தனையே இல்லாதவர் என்று பொருள்.

இறைவனை நினைவு கூர்வதால் உள்ளம் அமைதி பெறும் என்ற திருமறை வாசகத்தில் வருவதற்கேற்ப கவ்வாலி இசைக் கலைஞர்கள் தான் உச்சஸ்தாயியில் பாடும் போது இறைவனையே நினைவு கூர்கிறார்கள். இதனால் அவ்வாறு பாடுபவர்களுக்கு மட்டுமல்ல கேட்பவர்களுக்கும் உள்ளம் அமைதி பெறுகிறது என்றால் அது மிகையல்ல.

அந்த இசை உருவம் 'கயாலை'யும் 'கவ்வாலியையும்' கலக்கியது உலகத்தையே ஒரு கலக்க இருப்பதற்கு ஒரு முன்னோட்டம் தான்.
அவரின் ஒரே கனவு பாகிஸ்தானிலிருந்து இந்தியாவுக்கு வந்து அஜ்மீர் தர்காவில் அடங்கியிருக்கும் 'ஏழைகளின் பங்காளர்' (கரீபே நவாஜ்) ஹஜ்ரத் ஹாஜா முஹ்யினுத்தீன் அவர்களின் தர்பாரில் ஒரு இசை தர்பார் படைக்க வேண்டும் என்பதாகவே இருந்தது.

இந்த கனவு கிட்டதட்ட 8 ஆண்டுகள் கழித்து தான் நிறைவேறியது. பாலிவுட்டில் ராஜ்கபூர் என்ற ஷோமேனின் அழைப்பை ஏற்று ரிஷிகபூர் - நீட்டுசிங்கின் திருமண விழாவில் பாடுவதற்காக அந்த இசை உருவம் அழைத்து கௌரவிக்கப்பட்ட போது தான் அந்த கனவு நிறைவேறியது.

(குறிப்பு: ராஜ்கபூரும் பெஷாவர் எனும் பாகிஸ்தானில் இருக்கும் ஒரு நகரில் பிறந்து லைலாப்பூர் என்ற ஃபைஸலாபாத்தில் வளர்ந்தவர் தான். அதனால் தான் ஒரே ஊர் காரர் என்ற காரணத்தால் ரிஷி-நீட்டு திருமணத்திற்கு அழைத்தார். ராஜ்கபூர் ரஸ்ஸியாவில் தான் பிரபலம். ரஸ்ஸிய மக்களுக்கு காந்தி, நேரு எல்லாம் தெரியாது, ஆனால் ராஜ்கபூர், நர்கீஸ் என்றால் தான் தெரியும்)

பாலிவுட்டே அந்த இசை உருவத்தின் இசை கோர்வையை கேட்டு வியப்பில் மூழ்கியது.  இந்த இசை உருவம் உர்து தொடங்கி பஞ்சாபி, பாரசீகம் கடந்து இந்தியையும் விட்டு வைக்காமல் இசைத் தேனால் குளிப்பாட்டியது. உண்மையை சொன்னால் இன்னும் சில காலம் வாழ்ந்திருந்தால் நம் அழகிய தமிழிலும் இந்த இசை உருவத்தின் குரலை ஏ.ஆர்.ரஹ்மானின் புண்ணியத்தால் கேட்டிருக்கலாம் என்று நினைக்கிறேன்.

(குறிப்பு: ஏ.ஆர்.ரஹ்மானின் 'வந்தே மாதரம்' இசை தொகுப்பில் இந்த இசை உருவம் ஏ.ஆர்.ஆரோடு சேர்ந்து 'போறாளே பொண்ணுத்தாயி..' என்ற கருத்தம்மாவில் வந்த இசையை ரீமிக்ஸ் வடிவத்தில் கேட்டிருக்கலாம்)

இன்னும் ஐரோப்பிய இசைக் கலைஞர்களுடன் சேர்ந்து சோதனை முயற்சி  செய்து பார்த்த செய்திகளும் உண்டு. கின்னஸ் ரெக்கார்டில் கவ்வாலி இசை வடிவத்தின் அதிக தொகுப்புகளை படைத்தவர் என்ற சாதனை பட்டியலில் இடம் பெற்றதுமுண்டு.

தமிழில் பாடவில்லையே என்ற கவலை எனக்கிருந்தாலும் அவரின் இசையையும் விட்டு வைக்காமல் தமிழ் படத்துக்கு காப்பி அடித்த சம்பவமும் இருக்கவே செய்கிறது.

காப்பியடிப்பதில் சாதனை புரிந்த சுந்தர்.சி யின் முதல் படமான 'உள்ளத்தை அள்ளித்தா' படத்தில் கவுண்டமணி வாயசைக்க கார்த்திக் பின்னாடி ஒளிந்து கொண்டு பாடும் வைஜெயந்திமாலாவின் 'வாழ்க்கை' காலத்து காட்சிகள் நிரம்பிய 'மாமா நீ வாம்மா.. புத்தம் புது பாட்டு..' என தொடங்கும் பாடல் 'கின்னா சோனா தெய்னு ரப்னே பனாயா..' என்ற இவரின் பாடலின் இசை திருட்டு அல்லவா அது.

இன்றும் இசை பிரியர்களால் குறைந்த பட்சம் கவ்வாலி இசை பிரியர்களால் மதிக்கப்படும் அந்த இசை உருவம் 'நஸ்ரத் பதேஹ் அலி கான்' என்ற பெயர் தாங்கி உருவம் தன்னுடைய 48வது வயதில் ஆகஸ்ட் 16ல் 1997ஆம் ஆண்டில் காலத்தை முடித்துக் கொண்டு புகழோடு கரை சேர்ந்தது.

பின் குறிப்பு:

'கயால்' இசை வடிவத்தை 'கயல்' என்று தவறாக எழுதியதற்காக வருந்துகிறேன்

திருத்திய ஆபிதீன் நானா அவர்களுக்கு என் நன்றிகள்..

அதற்காக ஆபிதீன் நானா அவர்களை இந்த 'அல்லாஹூ அல்லாஹூ'வில் கரையுங்கள் என்று வாழ்த்துகிறேன்